Geregeld heuren we van aander Grunnegers dat we ien t Westerketier van die ‘kwietnieters’ bennen. Dat wordt zeid omdat wij ien ons toal n opvallende ie-klaank hemmen, t is n klaank die ien Noord- en Oost-Grunnen amper veurkomt en ien elks geval niet zo as bij ons. Wij zeggen: ‘wiet’ en ‘niet’ woar verderop ien Grunnen zeid wordt: ‘wait’ en ‘nait’.
Die ie-klaank heurt echt bij ons kaant van t Reitdiep – de grens van t Westerketier met e rest van Grunnen. Zo is de noam Overdieps of Overdaips ontstoan; t haangt der gewoon vanòf van wat kaant van t Reitdiep of Raitdaip de toal bekeken wordt.
Die Noord- en Oost-Grunneger ai-klaank is bij ons meest de ie-klaank, traauwens, voak krekt as ien Frieslaand. En dan is ok nog voak ons ie-klaank ien t Hollands de i-klaank. Dus woar wij zeggen: ’dat kiend viendt bladjes ien de wiend,’ is dat ien t Hollands aalmoal met de i-klaank: ‘dat kind vindt blaadjes in de wind.