Dat is n collumn ien e streekkraant. Nog mor net het stokje van Ria Horenga kregen en nou al ien e kraant. De week derveur ok al, toen over de burgemeester die op bezuuk was ien Visvliet, t is wat. Ik vond et een huule eer dat ik vroagd werd as veurzitter. Niet dat ik tied over heb mor met Mien Westerkwartier, doar heb ik wel wat met.
En t is al joaren leden dat ik kammeroad van Mien Westerkwartier werd. Een van e eersten volgens Geert Zijlstra. Doarnoast was ik ok een van de eerste vertellers bij ‘Kom op verhoal’. Optreden vond ik wel slim stoer. Ok omdat de verhoalen niet zo goed bij mij paasden. Wel wiet pak ik de droad nog weer es op.
En veurzitter… tja, van n club minsen die heurzelf behoorlek goed redden ken. t Bliekt dat er toch een veurzitter neudeg is. Wordt et allemoal veul aans met mij as veurzitter?
Ik hoop het niet. Nou ja alles wordt aans as je summege minsen leuven magen. Tieden veraandern en meschien Mien Westerkwarier ok. Ien ieder geval is het n veurrecht om te wonen ien n regio woar men zichzulf goed redden ken. Gien grootse dingen woarover we pochen. Mor met mekoar. Omkieken noar mekoar en Dicht bie huus. Dan is t mooi dat er n club is die ons met mekoar verbiendt ien n toal die we begriepen. Aargens las ik dat we as minsen verhoalen leven. Sprookjes, verhoalen uut de biebel of verhoalen dat de economie heul belangriek is. Stel je veur dat we met mekoar een aander verhoal wieten te vertellen. Ien ons eigen toal.
Wat willen we doen de kommende tied? Verbiendings leggen noar aangrensende regio’s. Ien Drenthe doen ze n bult met veurlezen en ze bennen beneid noar onze verhoalen vertellers. We willen groag op pad met verhoalen en liedjes en dan Westerkwartier breed. Dus ok ien Garnwerd, Zeuvenhuzen of Enumatil. We zuken ambassadeurs, contactpersonen ien elke ploats. Deur de loop van e joaren is er n bult spul moakt, folders, cd ‘s, boeken enz. Dat leit hinterdetwinter. Tied om dat bijmekoar te brengen. Op een vast stee. En ok de site van Mien Westerkwartier ken wel een nij uuterlek gebruken.
En wat we al joaren doen en doen blieven, het ‘Westerkwartier’ met al heur eigenheid uutdroagen wanneer en woar we mor kennen!