Menu Sluiten

Berend: Eén uut duuzend- Geert Zijlstra

Hetty zit midden ien e koamer met vier grote plastic bakken om heur hen. Op e vloer leggen hoezen van Elpees, henter en twenter deur mekoar en ze bekikt de hoezen.

‘Voor pappa: ‘Kate Bush, Wuthering Heights en De Dijk,  Bloedend Hart’

Berend zit bij de toavel pakt zien pen en begun te schrieven.

‘Nog één derbij veur opa, dan bin we kloar!’

Dizze zummer wadden de opa en oma van Berend verhuusd noar n kleiner stee en Berend had holpen met verhuzen. Toen er twee bakken met Elpee’s boven wotter kwammen had opa oneert.

‘Die moestoe mor hemmen Berend. Doe holdst van olle meziek en wie wiet bennen ze nog wel wat weerd. Lp’s bennen weer hielmoal hip. Kinst de hoezen wel aan e wand van dien foodtruck plakken.’

Berend wa-der wies met. Opa zien collectie gaf n mooi beeld van e sixties, Elvis, Beatles, Kinks, The Who, Neil Young en hij had zien bezit met zörg behandeld. Berend en Hetty hadden oavends een groot deel van e ploaten beluusterd. Loater die week kwam de pabbe van Hetty ok met zien collectie op e proppen. Hiele andere koek mor niet minder mooi. The Strangles, The Jam, Undertones, Police, Pearl Jam, Nirvana. Toen RTV Noord de Grunneger Duuzend aankondigde, kreeg Hetty n geweldig idee.

‘We kiezen 10 nummers van opa en 10 van pa en dan doen we er nog 5 van onszelf bij.

Ze begonnen te snuustern deur de mooie hoezen. Ploaten wadden toch zoveul mooier dan Cd’s. Ze roken sums lekker en die knisperende tikjes. Zo echt. Eén van de meest bijzundere ploaten van opa was n Picture Disc van Sergeant Pepper van de Beatles. Op et vinyl n òfdruk van de hoes met John, Paul. George en Ringo ien de bekende kleurege uniforms. Het gat zat boven ien e grote trom en deur Paul zien been. Mor toen Berend de ploat òfdraaien wol, liep de naald met n luud krassend geluud ien één keer noar et midden van e ploat. De zeldzoamheid van de ploat was zeker ten koste goan van de kwaliteit. Berend wist et zeker.

‘De letste veur opa moet van Sergeant Pepper , doe mor ‘When i’m 64, dat het er ja met gemak hoald.

Host  kloar. Zelf doen ze Lohues, Troebadoers, Harry Niehof, Janhenk en Piet Buist derbij en Berend drukt op ‘Send’ Hetty begunt de elpees weer op te bargen ien e kisten en is drok aan t zoeken. De kussen moeten alleerdeegs uut e bank.

‘Bist wat kwiet?’

‘Ja die Picture Disc van the Beatles, die heb je toch niet weggegooid’

‘Ach dat ding dee et ja niet meer’

‘Potverdorie Berend denk nou eens na. Dat ding is een ’special edition’, misschien wel 100 euro waard. Ja, gooi alles maar weg. Dat kleine ronde glazen tafeltje uit de gang het je ook al weggemikt, Doodzonde.’

Berend reageert niet, pakt de eerste kist op en brengt die noar de zolder. Ien n ommezien is de koamer weer ruum. Et is Sunterkloasdag, ze doen er niks aan mor Hetty wil toch nog eefkes wat lekkers hoalen. Berend kookt zien favoriet Bami a la Berend en dekt de toavel. zodat ze drekt aanvallen kinnen. Ok zet er twee mooi ienpakte deuzen ien e koamer. As Betty weerom komt met speculoastoart en twee dikke sukkeloadeletters zigt ze de deuzen stoan.

‘Hé is Sinterklaas toch geweest’.

‘Ja met twee pakjes veur dij, laaiverd!’

Het eerste pakje is wel dudelek. Derteg bij derteg en nog gien haalfe centimeter dik. Der komt een noagelnij exemploar van Sergeant Pepper uut. Dat andere pakket is ok zo’n beetje derteg bij derteg en wel 60 centimeter hoog. Betty vragt zich òf wat doar wel ienzitten zal en moakt het pepier lös. Klapt de deus open en zigt dan heur gloazen toaveltje uut e gang. Van onder et glas kieken John. Paul, George en Ringo heur aan. Berend is eefkes aan t knutselen west. Ze krigt de troanen ien e ogen en vlucht Berend om e haals.

‘Oh wat lief Berend, dat is echt een ‘special edtion’.  Jij staat bovenaan in de Grunneger Duuzend!