Noa de vakantie en noa de corona liekt alles weer op gang te kommen. De oavends en de weekends binnen weer vuld met van alles dat ien onze gemeente organiseerd wordt.
Veurege week zotterdag was n mooie dag. Stichting Muziekonderwies Grootegast en Kunstbedrieven Westerkwartier binnen fuseerd tot Kunstkwartier. Ik mocht dat huwelek ienzegenen en heb beide veurege organisoaties t volgende beloven loaten.
“ Blieven jim ienvesteren ien geluk zodat:
– Iedereen altied met doen kin.
– Cultuur overal te heuren, te zien en te beleven is.
– Dat jim der bennen veur t hiele Westerkwartier?
Wat is doarop jim antwoord”
Ja! Zeiden Martin en Anne die beide Fries binnen.
Ze hadden de vroag goed begrepen en ik heb er alle vertrouwen ien dat dit een goed ‘huwelek’ wordt.
n Ander mooi moment veur de streektoal vond ik de vroagenliest van Lifelines. Ik doe al de neudege joaren met, met Lifelines en de leste tied wadden t wel heul veul vroagen over corona. “Binnen joe meer of minder gelukkig dan 4 week leden, binnen joe afgelopen 4 week meer of minder snöttereg west etc”
Mor nou had Lifelines een vroagenliest over t gebruuk van e streektoal. De RUG doet er onderzoek noar. t Bliekt dat et spreken van twee toalen op loatere leeftied een positief effect het op t geheugen en de concentroatie.
Noa alle corona “hoe voel joe je” vroagen was dit weer leuk om te doen. En t bliekt dat ik onze toal voaker bruuk dan ik veurof docht had.
Hielke Westra