Met dat e liftdeuren achter heur dichtschoeven zicht ze t: Klem ien e aander hoek stijt één met n donkerrooie jaas, n bekende donkerrooie jaas. Verleden joar om dizze tied het ze zulf die jaas uutzöcht! Ze sloekt n moal stief, mor gelukkeg is der krekt genogt roemte om heur om te draaien. t Gezicht blift keerd noar de deuren, dat gieneen kin zien of ze misschien op e onderlip bit.
Weken laang har ze dat ienkopen doen aalweg uutsteld mor vanmiddag waas ze begonnen. Ok al regende t en ok al har ze der hielendal gien zin aan. Mor de vrije doagen vallen vanzulf krekt zo dat ze toch oareg wat ien huus hoalen moet.
Veur de dikste drokte aan waas ze n poar winkels bijdel west, tot e tassen ien t lest slim zwoar werden. De motregen moakte heur hoar plakkeg en liet e bril dampen, elke keer as ze n winkel ienliep, dat uuteindelek har ze onneerd eefkes n kop kovvie te drinken.
“Verdikke” zeit ze host haardop, want tot e viefde verdiepen het ze mor tied. Tied, om te bedenken hoe of t verder moet: woarof ze moandenlaang niet uutkwam moet nou ieneent. Tot e viefde verdiepen!
As e lift stoadeg noar boven schoeft gijt ze hoasteg alle meugelekheden laans. Geliek noar e roltrap droaven en hopen dat Henk – argens nog heur Henk – niks zien het. Of noa n poar stappen toch eefkes stoan blieven en wachten tot er heur ansprekt. Of gewoon wachten, as n volwossen vraauw met Henk n kopvol kovvie drinken en doarnoa op huus aan. Of, as er heur vragt om…
“Verdikke” zeit ze nou zo haard dat elkneen t heuren kin. Stoadeg wiezen e lampkes t an: 1e verdiepen, dan e 2e en lieke stoadeg draaien heur gedachten ien e rondte. Bij de viefde verdiepen kin ze aans niks bedenken as vanuut e lift noar e roltrap te broezen. Haalfweg kikt ze over heur scholder, zigt Henk ien zien donkerrooie jaas, en ze stoekt. n Poar stappen uut e lift blift Henk eefkes stoan, dat host tegenover nkander kieken ze mekoar an. Beiden met n natte jaas en nat hoar, beiden met tassen en puten kerstboodschoppen.
En elk wacht, of e aander zeid: “gijst met?”
Verschenen ien: ‘Nije Grunneger kerstverhoalen’, n uutgoave van Stichting ‘t Grunneger Bouk, Scheemda 2006.