Dunderdag kreeg Maans ieneenent telefoon van zien huusarts. Hij kon zotterdag om 12 uur kommen veur n Corona-vaccin. Maans had eerst nog vroagd of dat wel neudeg was, hij was ja immers nooit ziek. Mor dokter Wim had hum adviseerd om mor toe te happen: “Want anders kom je onderaan de lijst te staan en moet je misschien wel tot de zomer wachten. Vanmörgen las er nog ien kraant dat een vaccinweigeroar ien et ziekenhuis opnomen was, dus stapt er met Pjotr op e fiets en riedt richting praktijk. As Maans het pad van de praktijk oprid, gijt e veurdeur net open en komt er n stroom volk noar buten. Et lieken wel balsturege hokkelingen die ien april et verse gruunlaand ien magen.
Eén man zwaait uutbundeg met zien vaccinatiebriefke. ‘Hij is binnen!’
Maans zet e fiets tegen t hek, biendt Pjotr vast en drekt komt de Alpaca, waar Pjotr n moand of wat leden ok al met proat het, noar hum toe.Maans lopt noar de achterdeur van e praktijk woar 15 leeftiedsgenoten uut et dörp stoan re wachten. Gries hoar, hippe brillen, stoere jassen en drok proatend over de redding die nabij is. De doktersassistente lopt tussen et groepke deur met formulieren en n pen.
‘Ah meneer Bos. U bent toch wel gekomen. Fijn! Heeft u onlangs Corona gehad en geeft u toestemming dat we gegevens omtrent uw vaccinatie verstrekken aan de overheid?’
‘Noar mien idee heb ik gien Corona had wicht. Wel wat last van wienderegheid mor dat zal wel van e siepels kommen. En geef mien gegevens mor gerust aan Den Haag. Die pepieren roaken die knuppels doar toch wel kwiet. Ben-we host aan e beurt?’
De achterdeur zwaait al open en één veur één goan de patiënten noar binnen.
De Alpaca is al tegen Pjotr begunnen te proaten over zien belevenissen.
‘Man t is hier n drokte van belang en dat op zotterdag. Et is net of t hier almoal te hoalen is vandoag. Om acht uur stonden de eersten al te wachten en t lopt af en aan.En de proat die die mensen hemmen. De één het n buurvrouw die wel vier doagen ziek west het noa heur prik en de ander wiet zeker dat et spul toch wel niet helpen zal en weer n ander is net bekeerd van e gedachte dat er met et vaccin een 5G ontvanger ienspoten wordt.’
Pjotr kikt hum vroagend aan.
‘5G is dat net zukswat as tweedrank of 3-in-de-pan’?
‘Nee dat het wat te moaken met mobieltjes, doar wiet ik verder ok niet veul van. Mor as et volk hier stijt te wachten dan bennen ze een beetje van e ket en vanzulf gespannen. t Bennen net kiender die op schoelreiske goan en op e bus stoan te wachten!’
Dat gevuul is Pjotr onbekend, mor zo’n bereisd dier as n Alpaca zal et wel wieten.’
‘Is er al n Corona-variant veur Alpaca’s en Lama’s. Dat spul woont oardeg dicht bij Bolsonaro, die domme premier. Wat dat betreft hemmen wij et nog troffen met n premier met geheugenverlies.’
‘Nee jong, die ziekte die kriegen we niet. Alpaca’s en lama’s bennen propere beestjes. As wij wat vremds ien e bek kriegen, spijen we et drekt weer uut! Geldt ok veur virussen!’
Maans komt er al weer aanlopen met n vaccinatiebewies ien e hand en een n nuver doametje noast hum.
‘Ik hoop maar meneer Bos dat ik niet te veel last krijg van de vaccinatie! Ik ben wel wat bang geworden van al die berichten op Facebook over ‘bijwerkings’ en andere dodelijke dingen.
‘Doar ben je nou mooi te loat met vraauw, et spul zit er nou al ien. En je moeten mor zo rekenen. De bijwaarkings van dit spul bennen zeldzoam en voak goa je der niet dood aan. As joe Corona kriegen dan kin t wel es vremd òflopen. En met joen 65 joar ben je niet meer as eerste aan e beurt ien t ziekenhuus. Dus ik zeg: ‘Voorkomen is beter dan genezen!’
‘Ja, ik weet het, u heeft gelijk meneer Bos.’
As Pjotr even loater weer ien t bakje veurop e fiets zit, kikt er trots achterom noar zien boaske en denkt. ‘Zoveul wiesheid uut zo’n simpele kirrel, misschien moet hij mor minister worden!’