Menu Sluiten

Jelte en Egge, mor ok Omke en Eelke – 2020 november

De veurnoamen Jelte en Egge kennen we van de Westerketierder schriever / dichter Jelte Dijkstra en Egge Wieringa, de veurnoamen Omke en Eelke kennen we van de centenmannen Omke Oudeman en Eelke Solle van Mien Westerkwartier. Mannen van noam dus en ok nog es mannen met n veurnoam op -e. Dat is gien toeval.

Ien t Westerketier hemmen mannen van oorsprong n algemene veurnoamnoam [bv. Geert, Piet(er) enz.] mor ok voak n veurnoam met as leste letter de -e [bv. IJe, Melle enz.].

Op t online tiedschrift “Neerlandistiek” is op 23 okt. 2020 n artikel ploatst van Gerrit Bloothooft en David Onland, twee toalenmannen die onderzuuk doan hemmen noar Grunneger veurnoamen ien e 19e eeuw. Dizze mannen goan veur de 19e eeuw uut van veurnoamen per regio.

t Viel op dat bij veurnoamen ien Oost-Grunnen voak de leste letter de -o is [bv. Popko, Fokko, Harko, Tammo enz.] woar t ien West-Grunnen, dus bij ons, noamen bennen op -e [bv. Popke, Fokke, Harke, Tamme enz.] Traauwens, ok veurnoamen dicht tegen t Fries aan, zo as Ebbel en Ubel kommen eileks allent ien t Westerketier veur en vanzulf ien Frieslaand.

Volgens de toalmannen Bloothooft en Onland verschoeft de Oost-Grunneger -o die bv. ien Fokko zit, laangzoam noar t westen en wordt ien t Westerketier en ien Frieslaand de veurnoam Fokke. Zodoende bennen der ien Frieslaand amper mannennoamen die eindegen op -o, t is doar host aalmoal -e.

PS n aander moal gijt t over vraauwennoamenTonko Ufkes