Sums heb je van die momenten ien het leven dat je van je principes ofglieden . Dat overkwam mij oflopen week weer es. Niet dat ik dreks op het misdoadergerspad wol of zo, mor wel zo’n gedachte da het alpmoal wel wat makkeleker kin ien t leven. Altied vrutten en sappelen om de kop boven wotter te hollen, terwiel dat er ok goenend binnen die, terwiel dat ze de kantjes der oflopen, dikke bedroagen zomor noar binnen hengelen.
Eerste keer dat mie dat overkwam was toen ik ien n stripboek, ik geleuf dat het ien Asterix en Obeliks was, een verhoal las van n luchtverkoper. De persoon verkocht zakken met lucht, en hij had doar n verhoal bie dat die lucht hiel specioal was, met die lucht was hiel wat biezunders aan de hand. Zien verhoal was zo stark dat alle minsen die puten vol kopen gingen. De zoaken liepen as n trein en hij wer der schathemeltje riek van. Totdat der uuteindelek deur de mand viel en ontmaskerd wer as n groot oplichter. n Pracht verhoal.
Ok heurde ik ooit n mopke van Sam en Moos die zo ien dit riegje thuusheurt. Moos kom Sam tegen en vragt hem wat of der tegenswoordeg veur de kost dut. “Nou”, zeid Sam, “Ik verkoop eulifantenkontenvlees”. “Woar hest het nou over?” “Eulifantenkontenvlees”. En Sam begunt n hiel verhoal hoe gezond of dat het wel niet is, het het n geweldege smoak en bij elk blik vlees krieg je n boekje met recepten. “Doe mij ok zo’n blik” zeit Moos, “dat wil ik ok wel es perberen”. Hij koopt n blik en krigt er n boekje bij. Ad-er thuus komt trekt er dat blik open en dan bliekt dat er niks ien zit. Hij op hoge poten noar Sam toe, “Wat flikst mie nou, der zit hielendal niks ien!!” “Ja”, zeit Sam, “doe hest gewoon n beetje pech, doe hest krekt het kontgat troffen”.
En wel wel es kikt noar de serie opgelicht van Jaap Jongbloed die zel net as ik versteld stoan hoe summege minsen deur t leven rollen met het oplichten van de één noa de aander. Woarbij ze zunder blikken of blozen ien de camera kieken en zeggen dat er niks van klopt en dat ze ien bepoalde gevallen alles terugbetoalen zellen. De politie kin voak niks doen omdat ze geld kregen hemmen met medewieten van de slachtoffers, en ja, je maggen ien dit land gewoon elk om geld vroagen.
En nou werd oflopen week bekend dat er n man was die gasloze CV-ketels bouwen ging. Doarveur ging der n febriek bouwen ien Roden en dat hiele spul kostte n poar cinten. Dus ging de man om geld vroagen en joawel, de Rabobank was de eerste die der ien stapte. “Kiek man. Doe hest zo’n goed verhoal, hier hest n miljoen dan kinst dien gang goan.” Nou bin ikzulf ien t verleden ok wel es bie de bank west om wat geld, ik was n kleine jonge ondernemer ooit en ik kwam dan ok om andere bedroagen. Loat we zeggen 2 x tienduzend gulden of zo. Veur dat ik dat kreeg mos der toch wel hiel wat gebeuren. Ze mozzen alles van mij wieten tot ien de treure, zodat je op t leste het gevuul hadden dat je kompleet ien je blote kont stonden. Ok al was mien verhoal der bij stiengoed, der mos aan nogal wat veurwoarden voldoan worden. De Bank nam gien enkel risico.
En dan zo’n man doar ien Roden, die flikt het dan toch mor weer. Is spoorloos, zel wel argens zien cintjes op zitten te moaken met de voeten ien de zee en n mooi wicht noast hem. Dus had ik dat gevuul weer woar ik dit verhoal met begon. Dat ik mien principes mor eem glieden loat. En ik ben begonnen te denken. Der bennen n poar ideeën boven drieven kommen en één doarvan zel de minsheid ien onze pervinzie zeker aanspreken. Ik goa n apperoat ontwikkelen woarmet gienéén ok mor ooit weer last het van oardbevens. Dat heb ik as Westerketierder groag veur de minsen aan aanderkant Stad over.
Allend, die ontwikkelingskosten leggen wel zo verrekte hoog, doar moet ik bie holpen worden. Binnenkört moak ik de bankrekening bekend woar alvast stört worden kin. Het liekt mij dat de NAM doar ok oareg ien ienteresseert weden moet, as die nou t veurbeeld geven met n poar tun, en jim doen der ok allemoal n bietje bij, dan denk ik dat ik het woar moaken kin. Mien verhoal is goed.