Menu Sluiten

Berend: STOPober – Geert Zijlstra

Anderhalf joar leden had Berend nog n ofgetraind liggoam. Stevege scholders een strakke blokjesbuuk en dankzij zien waark op e sportschoel een conditie as n peerd. De corona-tied en e foodtruck hemmen dat ien e war schopt. Zien blokjesbuuk is nou één dikke blok worden en toen er veurege week veur de oardegheid metdee aan n potje zoalvoetbal, stond er te hiemen en te poesten as n old peerd. Doarom het er zien trainingspak en zien loopschoenen weer opzöcht, want dit moet aans!

‘Ik goa weer ien training Hetty, hardlopen en fitness! Die dikke pokkel moet er of en doe kinst mooi meedoen!’

Hetty kikt hum verboasd aan, pakt heur pakje sigaretten van toavel, tikt der één sigaret uut en lopt met e aansteker ien e aanslag richting balkon.

‘Jij gaat maar lekker je gang jongen. Ik voel me prima zo!’

Ze had joarenlang niet smookt mor dizze zummer het ze t roken ieneenent weer oppakt. Eileks wiet ze ok wel dat et beter is van niet, mor ja dan moet e knop weer om en doar moet je je zelf eefkes veur zetten.

Toen Berend op e leste dag van september weerom kwam van zien rondje hardlopen, zat Hetty met sigaret op et stoepke.

‘ Luister es Berend, wat vindt je van het volgende plan. Ik ga meedoen aan Stoptober en stop met roken, om mij te motiveren ga jij meedoen aan de 4-mijl van Groningen.’

‘ Mooi plan!’, zeit Berend,  ‘mor ik heb gien startkoart veur de 4-mijl en t is vast stief uutverkocht.’

‘Geen probleem Berendje,  dat kan ik voor je regelen.’

Vanmörgen schoot Berend drekt zien loopschoenen aan. Hardlopen is toch n soort drug, as je der één keer aan begunnen, wil je aal meer en meer. Hij runt et dörp uut, de polder ien en zigt n poar honderd meter veur hum een andere loper ien n oranje trainingspak. Dat is n mooi richtpunt. Hij zet aan en lopt al vlot ien op e veurganger. Dan ieneenent zigt Berend dat et oranje pak de baarm ien schut en achter n boom verdwient. ‘Moet e geit even verstekken’ denkt Berend en lopt steveg deur. As er vlakbij de boom komt, krigt er t oranje pak beter ien t zigt. t Is Timo, n jonge die wel bij hum ien e sportschool kwam. Timo stijt met zien rug tegen e boom een sigaretje te roken. Een dikke kwalm rook komt uut zien neusgatten.

‘Moi Timo, even rookpauze?’

‘ Joah jong Berend, ik mos eefkes bijkommen.’

‘ Dastoe smookst onder t hardlopen. Ongezond, gezond zal ik mor zeggen!’

Timo zucht diep en kikt Berend een beetje betrapt aan.

‘Dat zit ziezo. Ik ben net stopt met roken met Stoptober, mor dat valt me niet met. Nou heb ik met mezelf ofproat, dat ik 3 sigaretjes per dag mag, as ik der mor een flink stuk veur loop! Doarom heb ik mien pakje sigaretten en e aansteker ien dizze knotwilg verstopt. Elke keer as ik hier laangs kom, heb ik even rookpauze!’

‘Dus doe trekst drie keer doags dien trainingspak aan om te roken. Is dat gien vrimde sportbeleving?’

“Nee jong, ik heb n beetje mazzel. Mien buurvrouw het veurege week heur been broken en zit met e poot op e stoel. Heur hond Herta moet wel uutloaten worden, ik heb aanboden om dat te doen. Tweemoal doags loop ik soamen met Herta noar de knotwilg. Krigt hij n hondekoekje en ik n sigaret. Veur elk wat wils en ik doe ok nog n goeie doad veur buurvrouw!’

‘En zo het dien vriendin niet deur dastoe  smokkelst, bist n toek ventje Timo! ‘

‘Weer thuus even gorgeln met wat mondwotter, dan ruukt ze hielmoal niks!’

‘Nou ja jong astoe der met leven kinst en denkst dast zo uuteindelek van e smokerij of komst, dan hest mien zegen!’

Berend zet weer òf, op huus aan. Thuus vertelt er Hetty et hiele verhoal van Timo. Ze schut ien e lach, lopt noar de kast en geft Berend een half pakje sigaretten en een startbewies en shirtje van de 4-mijl.

‘Kijk ik heb je startkaart geregeld en stop dit pakje morgen maar in Timo’s knotwilg, wat ik blijf er voortaan van af!’

Berend vermorzelt het pakje ien zien grote knuusten en gooit de restjes ien t zwientvat.

‘Ik breng hum niet ien verleiding ik zal Timo helpen, t is immers Stoptober!’

Mor ik ben niet meer te stoppen, hij spant zien spieren, gript Hetty vast en tilt heur met gemak de lucht ien. “Al bist gien Grunneger Wicht, doe blifst mien poedie”.

Hetty kikt hum diep ien e ogen…..heur prachtege blokjes vent!