Ik ben n rasoptimist dat zit gewoon ien mien natuur, het is vastroest ien mien denken en doen. Optimisme wint altied. Het torent huzenhoog uut boven hel en verdoemenis omdat dat leste je aanproat wordt deur pessimisten.
Nou was het oflopen week wel n krachttoer om positief te blieven. De ciefers van het coronagebeuren gaven nog gien reden tot optimisme, der wadden uutbroaken ien bejoardenhuzen en revalidoatsie centra. Het WK voetbal ien Quatar stijt ter discussie want de warkomstandegheden bij de stadions bennen zo bedroefd dat er doageleks doden vallen onder de gastarbeiders. Ien e kraant las ik dat snachts je reukorgoan niet warkt, dat kin gevoar opleveren bij brand en zo. Ien mien geval kin het trouwens ok veurdelen hemmen, mor doar goa ik verder niet op ien.
Op social media zie ik aal meer verschillen ontstoan tussen minsen die uuteindelek op zo’n platform vrienden wezen moeten, mor de doodswensen en ziekteverzoeken bennen voak hoofdzoak veur minsen die anders denken. Gatverdarrie wat n negativiteit en wat weineg respect veur de ander.
Zulf had ik vrijdag ok even een poar momenten dat ik het hiel stoer had met mien eigen ienstelling. Je hemmen wel es van die doagen dat het krekt liekt of alles tegenzit. Dat had ik dizze vrijdag ok. Ik ben gien digibeet ok al ben ik gien echte IT’er, ik kin mij oardeg goed redden met de computer. Mor sums moet je van zo’n ding gebruuk moaken terwiel dat je denken dat het er zunder oardeg makkeleker wezen moet. Omdat ik n huus aan t bouwen ben moet ik n aanvroag iendienen veur t verploatsen van wotter en stroom
Nou, goa zuks mor es aanvroagen via zo’n digi-formulier. Eerst moe-je ienloggen, mor het wachtwoord klopte niet meer volgens de site. Dus n nij account aanmoaken. Kon niet. Op mien mailadres was al n account aanmoakt. Nou ja, dus allent n nij wachtwoord. Zeker weer n vinkje vergeten, want het was weer fout. Om n laank verhoal kört te holden, noa vitteg menuten kon ik mien aanvroag ienvullen.
Ok al had ik ienlogd met al mien gegevens, dat most op t formulier nog n keer. En of ik ok schetsen had van de situoatie. Zo niet, of ik die dan zelf even moaken wol. En of ik ok n schonegrond verkloaring had. Ze wieten doar schienboar niet dat je gien bouwvergunning kriegen as de grond niet schoon is. Körtom, het ienvullen, met de bieloagen, kostte ok meer dan anderhaalf uur. En dat allinneg mor om de aansluting 11 meter te verploatsen. Welke mafketel het zuks bedocht……..
Ik was vergreld, duvels en knap roppeg ien e pens. Ben doarnoa eerst mor even met n kop kovvie ien e zun zitten goan. Ien e luwte was het heerlek, met het uutzicht over de prachtege landerijen van t Westerketier en de rust, kwam langzoam het goeie ien mij weer boven. Woarom zo kwoad, woarom zo vergreld.
Het kin toch niet zo wezen dat minsen allent mor het slechte willen. Met welke ienstelling of je ok rondlopen, je willen toch allemoal het beste veur mekoar? Je kinnen toch niet allent mor op alles tegen wezen. Je kinnen toch wel begrip perberen op te brengen veur elk die aans denkt. Doarom beste minsen, de veurjoarszun die mij dizze week opwarmde het mij weer met twee benen op e grond zet. Het er veur zörgd dat ik de toekomst weer zunneg ien de mude zie. En doarbie ben ik mie bewust worden dat ik der zulf aan warken moet. Doen jim met?