Menu Sluiten

Versoepeln – Piet de Vries

t Is vandoag 5 juni en dat is n doatum die we niet gauw vergeten. Want vanmiddag en vanoavend maggen we weer noar de kroeg. Niet dat ik zulf zo’n kroegloper ben, mor as der wat is dat niet maag, dan kiek je der toch noar uut dat het wel weer kin. Der bennen al verboden genog ien e wereld. Oflopen december schreef ik hier op dit plak ien mien column, dat ik altied positief ien t leven stoa en alles van e zunnege kant bekiek. En toen ik t over de spuiten kreeg die we kriegen kinnen tegen corona zee ik doar: “Jas hem der mor ien”. Die regel werd drekt claimd deur één. Jas hem der mor ien, das n superregel veur n carnavals hit. Jas hem der mor ien, doar kin je van alles bie bedenken. Ik hoop dat et er nog van komt, wel wiet, kommend joar. Ien elks geval hemmen we binnen Mien Westerkwartier oflopen week de droad weer oppakt. Ons theaterstuk, dat we schreven hemmen noar aanleiding van 75 joar vrijheid, goan we dit joar nog opvoeren ien t Barontheater. Woarschienlek wel ien n poar uutvoerings, t het ok alles te moaken met e anderhalve meter moatregel, of die wel of niet handhoafd word. Hol dus de agenda’s ien e goaten, het wordt n prachtege veurstellig.

En bie de Rederiekerskoamer Vredewold ien Tolbert, woar ik n trouw lid van ben, hemmen we de eerste schreden ok weer zet. Op 21 en 22 jannewoarie volgend joar bennen der weer uutvoerings ien e Postwoagen. De repetities begunnen binnenkört en elk het er zin aan. Ik hoop van ganser harte dat we dan met zien allen volle bakken trekken, net zoas vroeger.

Ik zol ok n oproep doen willen aan mensen die nog twieveln of zich negatief opstellen ten opzichte van t ienenten. Hoal die spuiten! De wereld wordt er beslist beter van. Bij mij hemmen ze der al twee keer één ien jast en ik heb er niks van vernommen. En doarnoast, op tied n Beerenburgje van Kalmoeskruden en je blieven zo gezond as n vis.

Nou las ik vanneweek toch n vrimd verhoal. Een verspreider van complottheorieën is oppakt. Het ging hier weliswoar om theorieën over kiendermisbruuk, de vroag blift dan wel over, woar leit de grìns. Ien e oflopen periode bennen der nogal wat complotdenkers west die hun ideeën verspreid hemmen en doar n hoop ellende met aanricht hemmen. Veul mensen met n minder stabiel gevuul nammen dat soort dingen over, omdat t voak brocht wordt met onderbouwing die zo echt liekt dat je t leuven. Zo’n manipuloatie vien ik kwoalek, minsen moedwilleg verkeerd beïenvloeden en doarmet aandern die zich n slag ien e rondte warken benoadelen. Meschien wordt et tied dat dit soort complotdenkers ok even aan e oren trokken wordt deur justitie. As t bie de één kin, woarom dan niet bij de aander.

Hoe het ok zij, we sluten dizze column vanzulf positief of. Der kin weer veul meer en dat he-we met te danken aan aal die ‘jaspartijen’ met de spuit. En t huven van mij drekt gien braspartijen te worden, mor goa der mor vanuut dat ik één dizzer doagen even één koop.

Proost!