De doagen worden langer en alhoewel april slim kold is kriegen we ok weer wat meer zun om e kop. Met andere woorden; t is veurjoar en mensen kriegen t veurjoar weer ien e kop!
Vanmörgen las ik ien t Dagblad dat de vrijwilligers van museum Nienoord alle spinrag vot hoald hemmen en dat t museum weer glimt as n ekkel. Kloar om weer open te goan. Allinneg wieten we nog niet precies wanneer dat dan is. t Grunneger museum is dizze week wel open ien n fieldlab omgeving. Loaten we hopen dat het n veurbode is zodat ok ons cultureel arfgoed straks weer te bekieken is.
Zo zie je mor dat uut n crisis kommen moeileker is dan ien n crisis terecht kommen. t College wil het doar met de ienwoners over hemmen. ‘t Niet allinneg hemmen over hoe we de kop boven wotter holden mor ok hoe we weer noar toekomst kieken kinnen. Doarom holden we de kommende weken “ronde toavel” gesprekken (en dan digitoal) over verschillende thema’s. t Thema woar we op 20 april met oftrappen is “cultuur”. Ik zie der noar uut om weer es met nije energie te kieken noar de toekomst, en met de creativiteit ien e cultuursector is dat n mooi thema om met te begunnen.
Hielke Westra