Dit wordt veur mij n beetje n vrimd stukje veur de Vannijs. Meschien is t wel de leste keer dat ik n stukje schrief mor ik hoop van niet. We binnen nou dik 3 joar op streek met de gemeente Westerkwartier en die tied is omvlogen. Volgende week binnen der gemeenteroadsverkiezingen en vlot doarop wieten we hoe ter veur stijt.
Tied veur n hiele körte terugblik mor belangrieker is meschien et veuruut kieken. Op t gebied van cultuur is er best et neudege gebeurt. We hemmen een kunstencentrum (kunstkwartier) dat de hiele gemeente Westerkwartier bestriekt, we hemmen een cultuurcoach en alle subsidies op t gebied van cultuur binnen ok al harmoniseerd. En dat alles mooi vervat ien onze cultuurvisie met n titel ien onze eigen toal “Ienvesteren ien geluk”. Die visie moet veur de kommende joaren dudelekheid geven welke richting we op willen met cultuur. Veur mij betekent dat ien ieder geval dat et goeie wark van de cultuurcoach deur zet worden moet en t liefst ok nog uutbreid. Dizze coaches kinnen der veur zörgen dat de kunst en cultuur terecht komt bij de doelgroep die der normoal gesproken minder met ien aanroaking komt. Doarnoast is t veur de kommende tied belangriek dat we onze culturele podia goed ien beeld hemmen en allemoal een beetje op dezelfde manier bedienen.
Ien soamenwarking met ’Mien Westerkwartier’ hemmen we ok mooie dingen doan. Dizze column is doar n uutvloeisel van mor belangrieker is bijveurbeeld de soamenwarking bij et tot stand kommen van jim boekje “Mien dörp” en de soamenwarking met het CTGC (Centrum Groninger Taal en Cultuur) om de streektoal ok ien t onderwies n plak te geven.
De kommende joaren wil ik groag de portefeuille kunst en cultuur holden mor ien de politiek heb je die zekerheid niet. Is dit dan n column ter ofscheid, of n deurstart noar nog es vier joar? En hoe sluut je zo’n column dan of? Met n “bedankt veur alles” of met n “tot de volgende keer”? Gelukkig het onze streektoal doar n heul passende oplössing veur.
Een welgemeend “Moi!”
Hielke Westra