Op de oost muur van t kerkje ien De Penne [Opende] stijt op n gevelsteen uut t joar 1748 t woord “Westerquartier”. t Is n olde steen en de menier van spellen dut ons host wat Fraans aan, met die letter ‘q’ van bv. t ‘Quartier Latin’ ien Paries. Dat klop ok wel, t Fraanse telwoord quatre = 4 zit der ien, krekt as ons woord ‘kwart’.
Wij wonen dus ien t vierde deel van ons pervinsie, vanolds waas t: Hunsingo, Fivelingo en Stad (met t Oldambt en t Gorecht) en dus t Westerquartier. En omdat wij an de westkaant van Stad wonen past de noam Westerquartier goed.
Toch bennen de wiendstreken lasteg want t haangt der vanòf hoe we kieken; de noam Westerwolde met bv. dörpen as Troapel [Ter Apel] en Zèlng [Sellingen] lijt hielendal ien t zuudoosten van Grunnen, mor veur Duutsers ien t westen! Krekt as Oost-Frieslaand; bij die noam is uutgoan van West-Frieslaand, Frieslaand en doarnoa Oost-Frieslaand. Mor veur Duutsers lijt Oost-Frieslaand juust ien t westen.
Ien t Westerketier bennen nogal wat plaknoamen die vewiezen noar n wiendstreek, bv. Oostwold of Noordwiek. Toch bennen dit gien ‘dubbeldörpen’ want der is gien dörp wat ‘Westwold’ of ‘Zuudwiek’ hiet. Mor gelukkeg hemmen we wel alle vier wiendstreken ien t Westerketier: Zuudhörn en Noordhörn en Oosterzaand en Westerzaand.