Menu Sluiten

Toaltied – Rond Pinkstermaarkt

Krektleden waas t Pinkstern en eileks heurt doar op Tweede Pinksterdag bij: Pinkstermaakt. Ien n verske van Ede Staal, van zien 1e ploat uut 1984, zingt hij over ‘Pinkstern’ [met de letter ‘n’ op t ènde] en ok ien 2021 zeggen we t voak zo. [Dus niet ‘Pinkster’, zo as t ien t buuswoordenboekje van Siemon Reker uut 1988 stijt].

Pinkstermaarkt liekt n vervoegeng zo as we die veul meer hemmen; ien september is ien t dörp Roon [Roden] de Roonermaarkt en ien oktober is ien t dörp Zuudloaren [Zuidlaren] de Zuudloardermaarkt. t Is n “bezitsvervoegen”, dus de maarkt van Roon of van Zuudloaren wordt: Roonermaarkt of Zuudloardermaarkt.

Die “bezitsvervoegeng” op -er heurt zo t liekt bij Noord-Nederlaand, en dus wordt et: Zeuvenhuusterweg, Drachtstertram, Wilpster boys, Grunneger koek enz. enz.

Ien Hollaand vervoegt t voak aans: Feyenoord speult ien de Rotterdamse Kuip, bij landeleke politiek heurt t Haagse Binnenhof enz.

Tonko Ufkes