Op 8 september 2023 kwam de nije ploat ‘Oaventuren’ van zangeres Marlene Bakker uut en dat is groot nijs veur t Westerketier: Marlene is ien 1984 geboren ien Nijziel en ze het doar ok joaren woond.
Nijziel is n dörp met n biezundere noam; ien t Hollands is t Niezijl en ien t Grunnegs is t Nijziel – de beide klanken ien t woord draaien dus om. t Woord ‘ziel’ is ien t Hollands ‘zijl’ en t woord betekent ‘sluus’. Omdat t laandschop de leste poar honderd joar slim veraanderd is, kinnen we ons tegenwoordeg amper meer t nut van al die sluzen veurstellen. Mor ien de tied van de grote, open Laauwerzee en zunder bv. de Olde- en Nije Rugezandsterpolder warren al die sluzen neudeg: Muntjeziel (net ien Frieslaand), Laauwerziel, Pieterziel, Kommerziel en Nijziel.
Traauwens ok aanderkaant Reitdiep ontstonden dörpen rondom zo’n sluus; dichtbij lijt Haauwerziel, verder vot – an de Eems – leggen Delfziel en Termunterziel.
t Wordt nog duudleker as we de ie-klaank van t woord ziel spellen met de letter y, dan wordt t dus Muntjezyl, Laauwerzyl, Pieterzyl, Kommerzyl en Nijzyl. Vanuut t gewest Holland hemmen we ien Nederlaand de puntjes op de y kregen en zeggen we niet langer zyl mor zijl.
Bij ons buren ien t noorden van Duutslaand is dat niet gebeurd, doar bennen gien puntjes op de letter y. Doar hiet n sluus nog gewoon n ‘siel’ en as we ien Noord-Duutslaand laangs de Waddenkust reizen, dan kommen we n beste rieg sluusdörpen tegen, kiek mor: Greetsiel, Hilgenriedersiel, Nessmersiel, Dornumersiel, Bensersiel enz.
Tonko Ufkes