Toen ik mien veurege huus aan t verbouwen was, midden ien e natuur achter de Tolbertervoart, most ik of en toe wat aanvroagen bie de gemeente. Toen nog gemeente Leek. Ik wol wel n grote schuur bouwen, een dubbele garage en n ruumte veur wellness. Dus dee ik n aanvroag en wat docht je: Het mog niet. Het was te groot. Ik vroeg viefenzeuventeg vierkante meter en ik mog mor viefteg meter biebouwen. Op mien vroag woarom of dat dan zo was kreeg ik as antwoord: “We willen geen verstening in het buitengebied”. Ik heb die ambtenoar toen wat meewoareg aankeken, en dat was niet onterecht. Tien joar loater kwam der n plan veur n nije wiek noast ons, allemoal nijbouw midden ien e natuur. Met mij kwam het uuteindelek toch wel goed, as ik de welnessruumte op papier benuumde as ruumte veur dierstalling, dan mog het wel. Hoe verneuk je de minsen. Ooit was ik vertegenwoordeger veur n bedrief uut Rötterdam. Ik bereisde Noord Nederland en Noord Duutsland. Op eneg moment kon ik aan het bedrief ien Rötjeknor kommen, dan kreeg ik een beste boan met n dik traktement. Ze snapende doar niet dat ik dat weigerde. Ik probeerde ze uut te leggen dat ik veur gien gold, ja zelfs veur drie keer mien salaris niet die kaant op wol. Mij veuls te drok en veul te veul mensen bie mekoar. Ik hecht aan de rust en de ruumte hier bie ons ien t Noorden. En doarnoast wiet ik groag wel of der om mie toe wonen. Zunder dat het drekt je dikke vrienden bennen, buren bennen wel belangriek.
En wat gebeurde der nou oflopen week. Der werd bedocht deur n stel veuruutstrevenden dat er n poar honderd duzend wonings extroa biebouwd worden moeten ien t Noorden. En dan moet die snelle spoorlien vanuut Amsterdam der kommen, om te zörgen dat de minsen vlot hinneweer kinnen. Ik heb ien dizze column al eerder aangeven dat het van mij niet huuft. Loat we asjeblieft zuneg wezen op ons “Unic Selling Point” om het mor es even ien onvervalst Grunnings te zeggen, loat ons hier de rust en de ruumte.
Een groot deel van de pervinzie is al verziekt deur de gaswinning en tegenwoordeg bennen ze bezeg om de ruumte vol te pleuren met wiendmeulens en zunnepanelen. Doar is hier wel plak veur ja. Ruumte zat.
Ik ben es even noadenken goan woar of dat die poarhonderduzend huzen dan stoan moeten. Bie die wiendmeulens ien t oosten van e pervinzie willen die westerlingen vast niet wonen. En ok niet ien e gebieden die verzakken. Langs de waddendiek vienden ze het vast veuls te kold. Wat blift er dan nog over. Ja, ons mooie Westerketier. Mooi tussen de holtwallen en ien e Onlanden. Plak zat. De olle gemeentes Leek en Moarum hemmen altied al rekening holden met ruumte veur die spoorlien langs de A zeuven. Leek claimt zulfs een station. Kinnen de Hollanders zo uutstappen en onze buren worden.
Het is jammer dat ik niet meer wiet hoe die ambtenoar hiet die toen tegen mij zee dat men niet wol dat het butengebied verstenen ging. Want die man verdient een lintje. Hij had ienzicht ien e toekomst van het noorden. Ik bied hem hierbij alsnog mien excuses aan veur mien holding toen. Hij zol de perfecte toekomstege premier van ons land wezen kinnen. De profeet van Rust en Ruumte.