Menu Sluiten

Ploatenspeuler – Kloas v/d Kibbelhoogten

k Wiet nog best da-we onze eerste ploatenspeuler kregen. Oom en taante ien e Stad wisten nog een te koop.
Wij op n zundagmiddag met de heule femilie noar e Stad. Mien oom, voaije en oldste bruier en ik noar die mensen toe.
t Was n bovenwoning en heul oardege minsken. De ploatenspeuler wer aansloten en de luudspreker ston op e bozzem. En n stuk geluud, monsteragteg was dat.
Noa wat hinneweer vroagen en bieden ging er met. Veur zeuventwinteg en halve gulden. Wij de keuning te riek vanzulf en mor gauw weer op huus aan.
En mor ploatje draaien. "Loeënde klokken van Limburg mien landj" hadden wij der bij kregen. En hemmn we dan ok gries draaid.
Mor n poar doagen loater wol t ding ieneens niet meer. Wel van e jonges har de stekker van e luudspreker zomor ien t stopkontakt stoken, ienploats van ien e ploatenspeuler. Mor beurt was t met ploatje draaien schande genogt.

Kloas v/d Kibbelhoogten, Zeuvenhuzen