Menu Sluiten

Nijkerkermaart – Jan Bos

Hemmen jim veureg joar ok op Nijkerker maart west ? Nee? Dan zal k jim vertellen wat jim ontkommen is. Op Nijkerkerkermaart, dichtbij t dörpshuus ston n hiele dikke kerel, omtrent 1 meter bij 2 meter en dikke snor.Hij ston op n olle buuskoolwoagen, noast n bult stenen.En hij har n stem as n kenon! Wieten jim, roasde hij over t volk hen, wat der ien t joar 2040 te doen wezen zal? Amalia wordt keunegin, docht een, begun van de 2e  80-joarige oorlog docht n aander en de darde wol n reis noar Mars moaken. Mis, riep er. Stad Grunnen bestijt dan duzend joar! Duzend joar.

 

En hij keek over t volk hen net of er t zelf opbedocht har en zelf de eerste steen leit har.En, roasde hij wieder, omdat te vieren het t gemeentebestuur van Stad besloten dat Martinitoren ien Stad viefteg meter ophoogd worden zal. Viefteg meter? Ja viefteg meter! Joarenlaank was Martini t hoogste gebouw van Stad, mor deur alle nijbouw is t nou mor n dikke mollebult meer. En dat is t gemeentebestuur min noar t zin. Wat hemmen wij ien Nijkerk doar met neudig, vroeg een ? Hoe zollen ze dat doen willen, wol n aander wieten. En wel zal dat betoalen docht zunege Pieder.Wel zee de kerel en hij draaide zien snor ien n nije punt, ien Stad brandt geld heur ien e buus, as ze wat hemmen  geven ze t vot weer uut. Doarom gonnen ze n actie holden om de centen bij nkanner te harken.Veur 10 euro kennen jim een van dizze stenen kopen en doar wordt dan jim noam ien krast en dan ien e muur metseld. Dan stijt jim noam veur generoatsieslaank op Martinitoren. Zo en dat sloeg ien! Hier ien Nijkerk is de primeur, jim kriegen hier as eerste de kans om n steen te kopen, bulderde hij wieder.  Ze goan eerst n dikke muur van viefteg meter hoog bouwen. Dan kommen der twee dikke kroanen, Ome Loeks 1 en Ome Loeks 2, en die tillen hiele toren ien een keer op en zetten t olle vast op t nije. En dokter het al n steen kocht en domnee en börgmeester, en de stuutjebakker en de smid en de barbier en de snieder en de piedereulieventer en de lapkekoopman en nou jim nog. Mor wij hemmen der hier nog nooit wat van heurd, docht een haard op, zol dit wel de Hereweg laans goan. Ho ho ho zee de bulderman, ik ben De Boer, femilie van die De Boer die vroeger met hupzelen en sokholders bij de streek was. Tsja dat heurde vetrouwd. Langzoamerhand kwammen de mensen noar veuren, eerst de driesten en ze kochten heur n steen. t Werd apmoal opschreven wat der op mos. t Liep meroakel. Toen kwammen de aandern aan de beurt. Hemmen jim der nou ok nog wat van heurd hoeveul t opsmeten het? Ik heb der nooit weer wat van heurd….Wat?  Hij zal ons toch niet bij de bok doan hemmen?

Trouwens, we harren t wieten kint, De Boer zien hupzelen warren vroeger ok vergeefs nog te duur!