Elke seconde wordt er aargenswoar
op dizze wereld wel n lutteg kiend geboren.
Van Bombay tot ien Appelscha,
van Lutjegast tot ien New York.
Ze kommen overal, ok op plakken woar der niks te eten is
en de oorlog deur de stroaten giert.
Of woar allènt mor olders wonen,
die versloafd binnen. Zunder geld.
Niet alle kiender kiezen veur n mooi waarm bedje
met n hemeltje van kant, zachte kleertjes,
knuffels bij de vleet.
Nee zo’n kiend, zo klein en dapper
wil ok minsen bliede moaken,
die niet meer wieten wat bliedschop is.