t Is al weer 60 joar leden dat t eerste verhoal van Jant Nienhuis ien t Westerketiers verscheen. Dat verhoal, “Net as veurtied” ston ien 1949 ien t tiedschrift ‘Dörp en Stad’ en t stijt ok noa dizze ienleiden. Veur 1949 har Jant Nienhuis ien t Hollaands schreven mor ok toen waas t meest geliek duudlek dat Nienhuis van vroeger uut Olhoof kwam. Zo stijt meteen ien t verhoal “De vos” dat t speult rond heur geboortedörp. “De vos” ston ien 1929 ien t tiedschrift ‘Groot Nederland’, toen n bekend tiedschrift woar b.v. Louis Couperus en Nescio veur schreven en woar ok verhoalen van Jelte Dijkstra ien te vienden bennen. Ien 1941, 1946, 1949, 1950 en ien 1954 verschenen Hollandstoalege romans van heur en tussendeur nog n boek over de schilderes Maria Sibylla Merian. Geregeld komt streektoal veur ien die romans; mensen proaten of zingen ien e toal van Olhoof, mor eerst rond 1949 schrift Jant Nienhuis hielendal ien t Westerketiers.Het tiedschrift ‘Dörp en Stad’ ontston ien 1949 uut n ander bladje, de bekende K. ter Laan wer hoofdredacteur en wel wiet is dat belangriek west veur t schrieven ien t Westerketiers. Ien elks geval stonden noa t verhoal “Net as veurtied” nog n beste haandvol verhoalen van Jant Nienhuis ien ‘Dörp en Stad’. (Vanof de joaren1953 tot an 1957) Ze schreef ok veur t tiedschrift ‘De Warf’, ien t Hollaands en n verhoal ien heur eigen toal.
De olders van Jant Nienhuis harren n café ien Olhoof, t nog altied bestoande café Odeon. Zulf wer ze schooljuffraauw en ze verhuusde noa heur traauwen ien 1920 noar Utrecht.n Gedichtje, “Noabers dochter”, is deur Theo Westen op meziek zet en stijt ien ‘t Grunneger zangbouk’. Het verhoaltje “Van n arm huuske en n olle klok” wordt besproken deur Siemon Reker ien het lesboek “Toal. West-Groningen” uut 2005 (bl. 42-48). En ien 2005 wer ien Olhoof n nije stroat noar heur nuumd.Waark ien e streektoal is o.a. te vienden ien t tiedschrift ‘Dörp en Stad’; hier stoan wat titels met doarachter t joartal en e bladziede:
Net as veurtied, 1949, bl. 97-99
Oma was niks beter, 1953, bl. 154-156
Nog ainmoal weer, 1953, bl. 183-184
Aner weg, 1953, bl. 211-213
Van störm en snij en hoagel, I,1955, bl. 39-40
Hoagel, 1955, bl. 57-59
Snij, 1955, bl. 82-84
Onverschilleg?, 1955, bl. 182-184
“Dowidzenia…”, 1956, bl. 58-60
n Wonner, 1957, bl. 158
Ien t tiedschrift ‘De Warf’, 1955, bl. 54-56 stijt t verhoal:
Van n arm huuske en n olle klok
Ien t boek van J. Bierma, “Land en Volk van Humsterland” uut 1961 stijt dit verhoal ok en de noavertelde legende “Zusterkerk van Olhoof”, bl. 393-398 en bl. 421-424. Op bl. 412-413 wordt wat over heur leven verteld.Ien t tiedschrift ‘Toal en Taiken’, mei/juni 2006 bl. 154-155 gijt t ok over heur.