Het is 12 jannewoarie en onze minister president het net zeid dat we nog drie week langer thuus aan t wark bennen en thuus blieven moeten. Winkels bennen dicht en onze kiender kennen niet noar school. We hemmen ter mor met te doen. En wat hopen we dat we snel weer es noar t Baron theater kennen of noar de bibliotheek veur n goed boek of weer es noar n concert.
Ik had me ok al wat verkneukeld as t ging om de Nij-joarsrevue. We zollen op 22 december met t heule college noar t Baron om es flink “roast” te worden. Helaas gijt et niet deur en ik wiet dat er al veul wark ienstopt is en dan is t zunde dat et niet uutvoerd worden kin. Der zal vast n manier wezen om thuus of online de revue nog es te beleven. Jim bestuur is der met bezig.
Ien feberwoarie of meert wordt hoop ik de cultuurvisie van de gemeente Westerkwartier aannommen deur de gemeenteroad. De identiteit van t Westerkwartier en doarmet ok de streektoal, wordt doarien een belangrieke peiler. En nou ik dit zo schrief bedenk ik me dat we dan meschien ok wel aandacht besteden kennen aan meertmoand streektoal- moand.
Nog even vol holden zei onze minister president. Nog n poar week thuus en dan beetje bij beetje weer terug noar normoal. Ik hoop dat jim, jim tot die tied vernuvern met n goed boek, een film en met t omkieken noar mekoar. Veur de weekenden heb ik nog t neudege leesvoer leggen.
De wetholder van cultuur,
Hielke Westra.