Oflopen zotterdag bin ik noamens onze vertelgroep ‘Kom op verhoal’ noar Slochteren west. De vertelgroep doar hiet “De Pazzipanten”. Die groep bestijt 25 joar en doar hemmen ze een middag met van alles en nog wat veur organiseerd. Ok wij wadden uutneudegd. Mien vrouw mocht metkommen. Omdat ik niet alle doagen ien Slochteren kom heb ik de Tom Tom bruukt. Die begeleidde me keureg noar ‘Het Houtstek’, de lokoatsie woar t feest holden werd. Probleem was dat de bestemming volgens t apperoat zo ongeveer midden onder n viaduct was. Dat klopte wel mor ik kon der niet kommen. Dus mor weer terug en n parallelweg opreden. Toen kwam ik precies bij de andere kant van t gebouw uut. Toevalleg was aan die kant de iengang van t gebouw, dus dat trof. t Feest begon om twee uur. Eerst binnen der n poar sprekers west. Toen die uutproat wadden kwam t verhoal ‘Het geschenk van de rabbi’. De kiepkerel met zien vrouw wadden toen aan e beurt. n Mooie opkomst en leuke presentatie van alles wat ze ien e handel hadden. Geliek doar achter aan een veurdracht en aanslutend et vehoal ‘Op zolder’. Tiedens de pauze was der n diapresentoatie. Het tweede gedeelte mocht ik openen met ‘Kroakende zolder’, ‘Ondeugende mollechie’ was t volgende verhoal. Een duo zong liedjes met n lach en troan. Ze hadden der leuke verbiendingsteksten bij moakt.
t Leste verhoal was ‘De nozem en de boerendochter’. De belangstelling was uutstekend. Host alle stoelen wadden bezet. Der heerste een gezellege en gemoedeleke sfeer. Ok de inwendige mens werd niet vergeten.
As leste hemmen we met mekoar t Grunnings Volkslied zongen en was et ienmiddels vief uur. Noadat de zoak òfsloten was met n kort proatje binnen we weer op huus aan reden..
Henk Wierenga.