Menu Sluiten

Aargern – Piet de Vries

n Joar of wat leden heb ik mij één ding veurnommen, ik goa mij niet meer aargern. Van aargern krieg je stress en hartienfarcten. Niet doen dus. Want ik kwam er achter dat as je je aargern willen dat je doar wel hiele doagen met vullen kinnen. De één viendt dit en de aander viendt et krekt aansom. Zeker  tegenwoordeg op social media. Je binnen ergens veur of je binnen der tegen. En as je dan kieken hoe of de partijen mekoar ofmoaken, doar lusten de honden werkelek gien brood van.

Nou binnen der ok minsen die heur doarom niet met social media bemoeien. Ik wel, omdat ik denk dat ik ien stoat bin om te oordelen wat ik tot mij nimmen wil en wat niet.

Even terug noar dat moment dat ik mij veurnam mij niet meer te aargern. Dat was toen er n vrouw het bericht op Facebook ploatste dat heur grootste aargernis was dat de wc rol verkeerd om ofrolde. Nou wiet ik niet meer of die van de veurkant ofrolde of van e achterkaant, want op zukke onzin binnen mien hasses niet iensteld. As dat de belangriekste dingen ien je leven binnen, wat heb je dan n armzoaleg leven. Zukke onneuzelheden as n wc-rol. Gien probleem, niet aargern zee ik hardop tegen mijzelf.

Mor woar leit dan de grens. Hoe belangriek moet n zoak wezen om je der wel aan te aargern. En goandeweg mien gedachten kwam ik tot de conclusie dat die grens der niet is. Je moeten je gewoon nargens aan aargern. Wat of n aander ok dut of zeit, diegene dut dat vanuut zien of heur eigen overtuging en bedoelt et goed. En zolang ze niet overgoan tot dood en verdarf, loat ik elk ien zien weerde.

Ik moet wel zeggen dat et niet altied makkelek is. Ok ik ben striedvoardeg en stoa veur mien gedachtengoed. En as der dan één is die doar hard en dwars tegenien gijt dan moet ik mij bedwingen om der niet vol ien te kletsen. Zo ok kortleden, ik zat aan e broodtoavel met n koppeltje volk. En toen was der één die heur mes deur de pot met pindakees hiel en der noar heur zin wat teveul aan zitten had. Dus werd et teveul gewoon weer terugsmeerd over de raand van de pindakeespot. Ik had ok al zien dat ze et bij de botterpot ok doan had. Ik ontplofte zowat de stoom kwam mie uut e oren, mor hiel mij ien.

Vanneweek kwam minister Blok noar Garrelsweer. Hij had weer gien dikke puut met centen bie hum. Ik wil hier ien dizze column wel brullen dat ik dat huftereg vien, want dat vien ik, mor ik hol mij stil. Ok wadden der minsen die t belangriek vonden om de persoon te vienden die n wolf doodschoten het. Dat kwam ien “opsporing verzocht”. Hemmen ze doar niks beters te doen, echte misdoaden oplössen bijveurbeeld. Mor ik zeg niks. Verder kwam ik n neef tegen die n kepotte heup het, hij kin host niet meer lopen en wacht aal bienoa twee joar op n operoatie. Die operoatie wordt mor aal uutsteld want de behandeling van ongevaccineerde corona patiënten gijt veur. Ik hol mij stil, zeg niks, want ik moet elk ien zien weerde loaten, respect hemmen veur anders denkenden. En dat doe ik dus, want aargern is slecht veur mien hart.