Ien meert 1651 overleed Dato Iwema, hij waas volgens zien grafsteen: “oudt 63
jaeren” en n moand loater overleed ok zien vraauw Auko Goities. Zij waas
volgens heur grafsteen: “out ontrent 60 jaeren”. Dato en Auko bennen beiden
begroaven ien t mooie witte kerkje van Nijbert.
t Valt amper op en we lezen der zomor overhìn, mor op e steen van Auko stijt
echt “ontrent” met de letter “n” ien plak van met de letter “m”. Der bennen
nog n poar aander 17 e eeuwse grafstenen ien Grunnen woar t zulfde woord
”ontrent” opstijt. Die letter “n” het veural van doen met de uutsproak: Twee
moal de letter “n” ien t zulfde woord heurt ons beter ien e oren as eerst de
letter “m” en dan de letter “n”.
Bliekboar klinkt juust twee moal die letter “n” ien één woord mooi, want n
kammeroad har t lestdoags over de “rontonde” tussen Tolbert en Nijbert. En ja;
eileks is “rontonde” n veul mooier woord met die dubbele “n” en ienderdoad, t
verkeer gijt bij n “rotonde” ien e rondte.
Tonko Ufkes