“De jongelu proaten gien plat meer” wordt er wel voak zeid, as één et over t feit het dat et Nedersaksisch aal minder proat wordt. Mien ervoaring doarmet is net even aans. Ik ben op e Leek opgroeid, heb n hiele zet ien t butenland deurbrocht en kreeg aal meer wènst noar t Westerkwartiers: n toal die ik niet van huus uut leerd heb. Wat is t internet dan n uutkomst. Met meziek, podcasts (ok die van Stichting Mien Westerkwartier) en deur online met aander lu te proaten kin ok ik tegenwoordeg een oardeg woordje Westerkwartiers. En dat nota bene ien Brussel, woar t al stoer is om één te vienden die je ien t Hollands aanspreken kinnen.
Via Discord (n online chatplatform) bin ik n bult jongelu tegen t lief lopen die verbiending zöchten met geliekgestemden. Goenent uut verschillende delen van Nederland, mor ok goenent die krekt as ik ien t butenlaand woonden en verlet hadden om gesprekspartners ien t plat. Verleden joar hemmen wij mekoar opzöcht ien Zwolle. Grunnegers, Sallaanders, Tukkers, Veluwenoars, n Urker, van zo wat alle Nederlands Nedersaksische dialecten was er wel een bij. We hemmen de dag deurbrocht ien Zwolle, woar we n stadswandeling moakt hemmen en we hemmen de dag òfsloten met oavendeten en wat drinken.
n Oardeg bekende ‘Nedersaksivist,’ Martin ter Denge, was er ok bij en het de hiele dag drok met zien camera ploatjes schoten. t Resultoat mag er weden; n schier filmke (ondertitels ien e Nijsaksische Schriefwieze) met n rapport van de dag en n koppel interviews. Noast mijzulf ien t Westerkwartiers, binnen der nog n Veluwenoar, twee Grunnegers, n Sallaander en zulfs n Fries aan t woord. Zoas jim zien kinnen, binnen der nog genog jonge platproaters en niet allinneg ien Nederland. t Zol vanzulf ok machteg weden, as wij der de volgende reis n poar Duutser bij vienden kinnen. Benijd noar t filmke? Jim kinnen hum hier zien: https://www.youtube.com/watch?v=J2X4oxnY4xQ Mochten jim ok digitoal aanlegd weden, binnen jim vanzulf van harte uutneudegd om n proatje met ons te moaken op e Discord hier: https://discord.gg/fwctAKy3 Veur vroagen maggen jim mij ok gerust n mail sturen op jongdetomas@gmail.com
Tomas de Jong