|
Ons kerstkiendje lijt met ogen wied open ien e voerbak. Onze nije DVD het veurige week t levenslicht zien en is met goed ontvangen. Veul waark is de leste moanden verzet deur n nust mensen, mor t har zien nut: Bij de presentoatsie warren der zo’n 70 man, die noa de film allemoal eefkes stil bleven. Van verboazeng!
As Mien Westerketier kieken we terug op n goed joar, we bennen voak op pad west en hemmen n nust bekieks had. Mor nog veul belangrieker vien ik dat t wel liekt as of de creativiteit ien ons streek lösbarst. Of we het nou over de film “Die van hiernoast”, over de veurstellengen van SWET, of over de nije CD van Westkant Stad hemmen, der gebeurd van alles en dat brengt leven ien e brouwerij. We bennen al aan t waark veur onze nije uutdoaging “Kom op Verhoal” , doar over hieronder meer.
Dit is e leste Vannijs van 2009, doarom wil ik alle lezers, ok noamens de aander bestuursleden en Willy Bultje, onze webmaster, n mooie (witte) kerst wensen en alvast een ‘Veul heil en zegen’ veur t nije joar. Proost!
|
 |
Presentoatsie “Moest Kieken”
Geert Zijlstra, Vera Sutman, Ben Zielstra, Wobbe Gorter en Douwe Buiter (foto Omke Oudeman)
Zundag 13 december waas t dan eindelek zo ver. We konden onze nij DVD “Moest Kieken” zien loaten aan de metwaarkers, de pers en ons Kammeroaden. Ien e filmzoal van landgoed Nienoord hing n vremd soort spanning, want elkeneen waas slim benijd noar t eind resultoat. Het eerste exemploar ging noar Kammeroad en cultuurwetholler Koos Wiersma van e gemeente Zuudhörn. Hij von dat een mooi geboar, niet alleneg omdat er vot gijt uut Zuudhörn, moar ok omdat er de eigenoar is van de Rooie Eend, die n veurnoame rol speult ien t verhoal.
Doarnoa kwam t hoofdgerecht, de film “Moest Kieken” en dat ging er ien as koek. De reaksies warren positief, dat bleek ok loater dizze week ien e pers. Ok ien e winkel lopt de verkoop goed, dus wees derbij asstoe nog n exemploar onder de kerstboom wilst.
Klik hier om noar de foto's te kieken.
Verkoopadressen Moest Kieken
Kammeroaden van Mien Westerkwartier kriegen de DVD vergeefs. Bist nog gien Kammeroad? Aanmelden ken op onze website (klik hieronder).
De DVD is ok veur 10 Euro te koop ien e winkel:
VERKOOPADRESSEN CD/DVD Mien Westerkwartier
LEEK:
Easy Entertainment
Tolberterstraat 19
9351 BB Leek 0594-516787
MARUM:
Primera
De Wending 71
9363 AZ Marum 0594-642391
GROOTEGAST:
Foto Zuiderveld / Koos Wieringa
Hoofdstraat 108
9861 AK Grootegast 0594-613880
GRIJPSKERK:
Boekhandel–Drukkerij Hoekstra
Herestraat 41
9843 AJ Grijpskerk
ZUIDHORN:
Music Store
Overtuinen 10
9801 BR Zuidhorn 0594-507662
Op 19 december presenteerde de nije band “Westkant Stad”, formeert rondom Gert Sennema, de nije CD: “Zo mag t Weden”. Ien e band speulen n nust vast gasten van Gert, zo as Vera Sutman, Emiel Driesten en Roelf Postma. Liefst 15 nummers hemmen ze opnommen, sums zeker herkenbaar as Sennema-nummers, mor ook mooie uutstapkes noar olderwetse folk of Indonesische klanken. De CD klinkt host live, hij is heel puur opnommen.
Nou mor hopen dat we dizze band de kommende tied ok met regelmoat ien t Westerkwartier bekieken kinnen, want speulen kinnen ze zeker.
Gefluuster ien t duuster – Coby Poelman-Duisterwinkel
Gefluuster ien t duuster
d’ Olle wilg is vot.
De jonge beuk
die altied
ien zien schaduw stond
groeit ien t licht
de ruumte dicht
en fluustert
ien t duuster
noar d overbleven stam:
“Ik mis die zo,
dien zuchten en dien kreunen,
dien steun ook ien mien rug”
moar hai heurt
niks meer terug,
gien tak ziet er meer wuiven
allain de grote paddestoel
op d overbleven stam
liekt n klain stukje
op te schuven.
Ien jannewoari gijt Mien Westerkwartier van start met het project ‘Kom op verhoal’. Het is de bedoeling om meer mensen as verteller ien e weer te kriegen en dat doen we op twee menieren. Wel zin het om het vak ‘Verteller’ te leren, ken bij ons wat lessen volgen, woarbij we de kneepkes van t vak leren, van een echte verteller.
Wel mooie verhoalen schrieven kin, die juust ok geschikt bennen om te vertellen, kin bij ons terecht met die verhoalen. Let op: ze moeten wel wat te moaken hemmen met ons streek, ien t Westerketiers schreven weden, moar het huuft niet over vroeger te goan.
In Mei/Juni wil we groag n stuk of vier vertel/muziekoavenden organiseren op verscheiden plakken ien t Westerketier. Hesstoe n mooi plakje, woar zo’n 50 man publiek ien kin, nem dan contact met ons op.
Meer wieten as verteller of schriever nem dan contact op via info@mienwesterkwartier.nl en hol de lokale kraanten ien e goaten veur meer nijs.
‘Hier was ‘t’ en Lutjegast
End september kwam van Harm van der Veen n mooi boek uut over 25 plakken ien ons pervinsie woar geschiedenis schreven is. De Grunneger titel is ‘Hier was t!’ en t het ok n Hollandse ondertitel: ‘Hier gebeurde het!’ want t is tweetoaleg. Van der Veen schrift ien ‘Hier was t!’ oareg wat over t Westerketier - 7 van e 25 geschiedenisplakken leggen doar – en vanzulf komt Abel Tasman roem an bod. Wel wat te roem, liekt het.
Harm v.d. Veen
Begun oktober kreeg ‘Stad en Lande’ de K. ter Laanpries en t uutbrengen van e ‘Canon van Groningen’ ien 2008 von de jury n goeie aanleiden om die pries te geven. Mor wel de ‘Canon’ der bijpakt kin zien dat doarien ( bl. 48) over Abel Tasman nogal zuneg stijt: “Het enige dat Abel Tasman aan de provincie Groningen bindt, is dat hij in Lutjegast is geboren en dat hij na zijn overlijden in Batavia de armen van dat dorp de somma van vijfentwintig gulden heeft nagelaten.” Met hiel aander woorden is t ok zo te zeggen: t Is toeval dat Abel Tasman krekt uut Lutjegast komt, hij heurt niet bij n traditie van Westerketierder zeevoarders en noa t ondekken van Austroalie ging haalf Grunnen echt niet an e reis noar t nije laand. Tasman wer achternoa n held omdat t volk ien Austroalie bij gebrek an eigen geschiedenis nou eenmoal helden neudeg het én omdat zo de Gemeente Grodegast heurzulf op e koart zetten kon.
Woarargens geboren weden zeit op humzulf nog niks! En om wat veurbeelden te geven van “echte” Grunnegers die boeten ons pervinsie geboren bennen: domnee P. van Leeuwen (Graft), Wim Faber (Zutphen), Peter Visser (Kortenhoef) Traauwens, aansom komt lieke goed veur: Freek de Jonge (Nijlaand), Dirk Scheringa (Griepskerk) enz.
Blift stoan dat Abel Tasman hum n Lutjegastmer vuulde: hij liet bij zien dood 25 gulden noa veur de armen van zien geboortedörp. Dat is vanzulf n staark punt, dat moakt t veur Abel Tasman ok weer wat goed. Mor veur n belangrieke Grunneger zeeheld is t aalmoal an e moagere kaant.
Tonko Ufkes
|
 foto: Omke Oudeman
Colofon
Vannijs is de nijsbrief van
Mien Westerkertier
Nr 7 december 2009
Redactie:
Geert Zijlstra
Willy Bultje
Eelke Solle
Tonko Ufkes
Vannijs wordt regelmatig toegezonden aan personen die zich aangemeld hebben. Onder aan deze nieuwsbrief vindt u de knoppen voor het aan- en afmelden.
Schroom niet om de Vannijs door te sturen aan uw vrienden of kennissen, die interesse hebben voor het Westerkwartiers.
Stichting Mien Westerkwartier is in 2007 opgericht om meer bekendheid te geven aan de taal en cultuur van het Westerkwartier.
We doen dat door:
- netwerkfunctie en vraagbaak
- stimuleren van uitgaven
- organisatie activiteiten
- cursussen/workshops
- website en nieuwsbrief.
|
