|
Dichters ien de tuun ien Nijhoof
Willem Tjebbe Oostenbrink: foto Omke Oudeman
Zo langzoam aan is t al traditie, elk joar verzoamelen Westerketierder dichters heur ien e tuun van Café Eiseshof ien Nijhoof. Dit joar is dat op 3 juli tussen 15:00 en 17:00 uur.
Noast de dichters Arie Meijer, Klaas Duursma, Alie de Vries, Tonko Ufkes en Willem Tjebbe Oostenbrink speult ok troubadour Martin Korthuis zien verskes. Ientree: 4 Euro.
Op d foto Willem Tjebbe Oostenbrink die met zien gedichtencyclus "Bewaarkt Verleden" n tweede plak hoalde bij de Duitse Klaus Groth Pries veur nije Nedersaksische Gedichten. "Bewaarkt Verleden" bestijt uut vief gedichten: Takken, Piekjes, Moeke, De smoak van hooi, Goldjebloemen.
De leste SWET ien Leek en De Wilp
Bert Postma ien de hoofdrol: foto Omke Oudeman
Het contrast tussen wat waas en wat komt waas nog nooit zo schaarp as ien SWET-7. Al zes keer eerder wer stilstoan bij een verdwienend stukje identiteit van t Westerketier, mor op e Leek zaggen we n waarm kloppend haart dat verscheurt wer tussen old en nij. Uuteindelek wer t nije leven geboren ien de olde buurt.
Aan t ende van SWET, gaf het project het Westerkwartier zien eigen volkslied. Luuster mor eefkes op onze website www.mienwesterkwartier.nl veur t resultoat.
Over t Bloode Voetenpad
Mooie natuur en staarke verhoalen, wat wilst nog meer? Op vrijdag 15 juli kinst om 19:30 begunnen an n wandeling van ongeveer twee uur deur de Peebos en over het Bloode Voetenpad. Natuurgidsen wiezen op al t biezundere wat rondom te zien is. Onderweegs komst n poar vertellers tegen, die dan n mooi historisch, streekgebonden verhoal vertellen.
Noa òfloop nog noaproaten en n draankje bij t kampvuur noast de Werkschuur van Staatsbosbeheer. Opgeven ken via de website www.komopverhoal.nl.
Workshop Westerketiers
Tonko Ufkes en Alie de Vries hemmen ien mei n körte workshop Westerketiers geven aan mor liefst 18 deelnemmers. Ien de Vrijborg ien Nuis kwam de groep drie moal bijmekoar om wat te oefenenen met t Westerketiers. Van t noajoar is zo’n soort cursus ien Moarum, dat wordt regeld deur t Marheem.
Tiedens de workshop ien Nuus bennen een poar elfkes moakt deur de deelnemmers. Bij dit ploatje mossen ze n kört gedichtje moaken. Ien dizze Vannijs stoan een poar veurbeelden, schreven deur de cursisten.
Cultuur bij t Kampvuur ien Nuus
Ien t kader van 200 joar Moarum, organiseert de Culturele Raad op zotterdag 2 juli 2011, ‘Cultuur bij het kampvuur'. Aalmoal dichters en muzikanten uut e gemeente Moarum doen met.
19.45 uur. Opening deur de veurzitter van de Culturele Raad; Karel Grondsma.
20.00 uur Egge Wieringa
20.10 uur Hinke Dijkhuizen
20.20 uur Pot, Baumgarten & Friends (volksmeziek, jazz en n snufje klassiek.)
20.40 uur Klaas Duursma
20.50 uur Alie de Vries
21.00 Pauze
21.10 uur Pot, Baumgarten & Friends (muziek)
21.30 uur Martje Grondsma
21.40 uur Melle Hijlkema
21.50 tot 22.10 uur Pot, Baumgarten & Friends(muziek).
Ploats: Museum 't Rieuw, Oudeweg 15b, Nuus.
Elfke 1 - Bert Weggenmans
Twee
Olle bokjes
Longern noar e zun
En noar n gruun bladje
vlakbij
De agenda
Zotterdag 18 juni: Billie Turf Wandeltocht Zeuvenhuzen
aanvang 8:00 uur Wandelen deur t mooie zudeleke deel van t Westerkwartier, diverse culturele attraksies. Tussen 12:00 en 16:00 vertellen Piet de Vries en Geert Zijlstra bij t Bolmeer.
Vrijdag 24 juni: Korenoavond Northern Meeting
aanvang 19.00 Kruisweg Moarum
Diverse Westerkwartierder koren treden op met o.a. Schotse verskes.
Zotterdag 25 juni: Kunst en Tuin 10-daagse ien Midwolle
aanvang 18.30 kerk Midwolle en tuun van familie Boekhold (Hoofdstraat 128 Midwolle
De mooie tuun bekieken, luusteren noar meziek ien streektoal (Piet Buist en Geert Zijlstra), kieken noar de vertellers van Kom op Verhoal (Piet de Vries, Hennie van der Laan) en een optreden van jonge muzikanten ien e kerk (Leerlingen van Debora Prins).
Zundag 26 juni: Verteltocht Groninger Landschap Zuidlaardermeer
aanvang 12.30, opstap diverse plekken Zuidlaardermeer
25 Kilometer fietsen deur het schitterende natuurgebied rond het Zuidlaardermeer en onderweegs luusteren noar vertellers, zo as Eelke Solle, Piet de Vries, Piet Buist en Martin Noorda.
Zotterdag 2 juli: Northern Meeting
Hiele dag op en rond de Baak Lutjegast
Te veul om op te numen, kiek mor op www.northernmeeting.nl
Zotterdag 2 juli: Cultuur bij t kampvuur ien Nuus
Aanvang 19:45 , Museum 't Rieuw, Oudeweg 15b, Nuus.
Zundag 3 juli: Dichters ien e tuun
Aanvang 15:00 , Café Eisseshof Nijhoof
Diverse dichters en troubadour Martin Korthuis
Zotterdag 9 juli: Robles Rock ien Grootegast
Aanvang 13:00 , Notoaristuun, Grootegast
Diverse bands, o.a. Handsome Poets, Only Seven Left, Spotrockers, Switch, VanderLinde
Vrijdag 15 april: Wandelen ien de Peebos
aanvang 19.30 Werkschuur Staatsbosbeheer Peebos
Kiek veur meer nijs op www.mienwesterkwartier.nl
Elfje 2 – Rolf Haseloop
Vrouw
Zit veur
De donkere deur
Der stoan mannen veur
Berouw
Twee gedichten ien e priezen
Bij de 16e Grunneger Schriefwedstried 2011 kregen twee gedichten ien t Westerketiers n pries: Renske de Vries uut Zeuvenhuzen won de tweede pries ien e groep 13 tot en met 17 joar met heur gedicht ‘Lente’. Lucie Pakes uut Ollekerk dee met ien e groep 18 joar en older en won de daarde pries met ‘Aangstbeeld’. Ok wij bennen slim groots op dizze beide vraauwen!
Hier onder stijt t gedicht Aangstbeeld van Lucie Pakes
Aangstbeeld
Woar ofval zwient
ien baarm, wal en sloot,
achteloos votsmeten
tussen brannekkels, ruut.
Ontdoan van woddels,
coulissen: ruggegroat
van n landschop, n volk.
old dut òf, nij telt.
Met stam en stiekels
met tak, knop of spruut
worden toal, gewoontes
verbraand, verhakseld.
Tot n brij vermoalen,
gien onnerscheid, gien kleur.
Sproakeloos leeg dit laand,
schroal ien boom en toal.
Northern Meeting
Op 2 juli is de grote manifestoatsie van Northern Meeting, de ontmoeting van Schotse en Westerketierder cultuur in dizze regio. Op het terrein bij de Baak ien Lutjegast kinst de hiele dag genieten van Schotse tradities as zwoarddaansen en doedelzakspeulen, luusteren noar Schotse meziek. Aan t ende van de oavend wordt het theaterspel ‘Stien of bragel’ speuld.
Doe kinst n koartje kopen veur de hiele dag. Kiek op www.northernmeeting.nl
Elfje 3 – Pillie Wierenga
Een
mooie vrouw
op een muurke
tussen twee olle snoepers
bofkontje
Cursus lezen en schrieven ien t Westerkwartiers
Ien oktober wordt n cursus lezen en schrieven ien t Westerkwartiers geven ien Moarum, t Marheem regelt dit.
De cursus bestijt uut e volgende onderdelen:
* Lezen en bespreken van verhoalen, gedichten en verskes van Westerkwartierder schrievers.
* Schrieven ien t Westerkwartiers, behandeld worden de spelling, grammatica en t zulf schrieven van gedichten en verhoalen.
De cursus wordt geven deur Tonko Ufkes en Alie de Vries. op dunderdagoavend 6, 13 en 20 oktober 2011 van 20.00 tot 22.00 uur. De kosten bennen € 35,- p.p.
|
