|
Vertellen en wandelen ien Nuus
Wiepie Tolsma vertelt, foto: Willy Bultje
Noa het succes van Olhoof en Nijkerk trekt “Kom op Verhoal” verder noar t Zuden. Op zotterdagoavend 19 juni treden ze op ien Nuus. Dat wordt wat aparts, want moest aan de wandel deur mooi Nuus om de vertellers allemoal te heuren.
Om 21:00 verzoamelen bij Dörpshuus ‘de Vrijborg’ en dan aan de wandel noar de kerk, de petten en de Coendersbörg. Bij min weer kommen de vertellers noar ‘de Vrijborg’.
Vertellers bennen dizze keer: Alie de Vries, Meindert Meines, Alex Bultje, Piet Buist en Eelke Solle. Geert Zijlstra zörgt soamen met Piet Buist veur de meziek. Wel wiet, komt er net as ien Nijkerk wel weer een (tropische) verrassen!
De agenda
KOM OP VERHOAL ZEUVENHUUZEN
Op moandag 5 juli trekt de ‘Kom op Verhoal’-karavaan noar café Kajuiter op de Haspel (bij Zeuvenhuzen). Vanof 20:30 kommen verscheiden vertellers aan bod en dizze keer kriegen ze n verassende muzikoale steun. Astoe zulf ok wat vertellen wilst, bist welkom op het podium, want juust zukse dingen moakt de zoak levendeg.
Kiek op www.komopverhoal.nl veur t leste nijs en het programma.
PLATTELANDSCAFE
Op de langste dag worden je deur Werkgroep Streekinitiatief Westerkwartier uutneudegd veur het Plattelands-cafe op t Curringheveld in Kornhorn. t Wordt vast weer een biezunder programma. Kiek moar op de flyer
uitnod plattelandscafe 2010.pdf
Dichters ien e tuun 2010
Willem Tjebbe Oostenbrink, foto: Omke Oudeman
Zundagmiddag 13 juni werden de moezen en oksters uut e tuun van e Eisseshof ien Nijhoof verjagt deur 5 dichters en 1 meziekman: Dit joar al weer veur de darde moal wer der veurlezen deur vief Westerketierder dichters en zanger Sijtse Scherenga speulde n thuuswedstried. Zo’n 30 mensen genoten van Arie Meijer, Willem Tjebbe Oostenbrink, Lucie Pakes, Tonko Ufkes en Alie de Vries.
t Het elkneen goed voldoan, dat ankommend joar stoan grif weer dichters ien e tuun ien Nijhoof.
Lianne Hut wint bij de Schriefwedstried
Al weer veur de vieftiende moal wer op 11 juni de finoale van e Pervinzioale schriefwedstried holden ien t Pervinsiehuus ien Stad. Ien dizze finoale zatten uut t Westerketier bij de dichters Klaas Duursma uut De Wilp, bij de verhoalen Martje Grondsma uut Moarum en bij de jeugd Lianne Hut uut Zeuvenhuzen. Deur de jury wer t gedicht ‘Mien Valentijn’ van Lianne Hut uutkozen as de beste en n dikke pluum gijt doarom noar Lianne uut Zeuvenhuzen!
Hieronder stijt het winnende gedicht:
Mien Valentijn - Lianne Hut
k Wiet
messchien niet alles
mor k wiet
wat ik vuul.
As ik gelukkeg bin,
wil ik dij gelukkeg moaken.
As ik reer
wil ik dien handen vulen
die stoareg de pien votstrieken.
Al moandenlang binnen wij een
we letten op gieneen om ons hìn.
k Wil veur altied bij dij weden
doe bist mien Valentijn.
Oameland-2– Melle Hylkema
De eigenoaregheid van et vertrek
tussen goan en kommen
et hemelhoge hek,
elk zet op zien eigen grond
de eerste of de leste pas.
Veuruut laanszied herinnering
boanen et pad apaart veur
de uutstoken en de
hoogheven haand.
Groezelglas dempt al
et zicht, nog veur de
ofstand komt.
Noordeleke (ver)Toalen op NNRD
Woar mensen denken dat Drenten, Grunnegers en Friezen niet deur een deur kinnen, en veul ruzie hemmen, bewiest NNRD t tegendeel. Dit òfvalbedrief het personeel uut t hiele Noorden en viendt t van groot belaang dat elkeneen hum thuus vuult en gelegenheid krigt zien of heur eigen toal te bruken.
Vanzulf geldt dat niet allent veur personeelsleden, mor ok veur klanten. Om dat uut te droagen het t NNRD nou n hielendal viertoalege webstee (Hollaands, Drents, Grunnegs en Fries). Hiermet is NNRD t eerste bedrief ien Nederlaand dat zó bewust n keus moakt om op n grootse menier heur (noordeleke) identiteit zien te loaten. (zie www.nnrd.nl)
|
