|
 ‘Kom op Verhoal’ ien Olhoof
foto: Omke Oudeman
Ruum 25 man (en vraauw) luusterden ien boerderij Hayemaheerd veur het eerst noar de verhoalenvertellers. Twee uur vertellen ofwisseld met meziek, liekt n mooie formule, doar kinnen we aan vast holden.
Piet de Vries, Jan Hut, Meindert Meines, Wiepie Tolsma en Alex Bultje kwammen op t podium (veur de stropakjes) en Geert en Piet speulden tussendeur wat verskes. Zie de foto veur n sfeer-ienpressie.
Op dinsdag 1 juni was “Kom op Verhoal” te heuren bij RTV-Noord. Eelke Solle dee uut e doeken wat der gebeurd is en wat nog komt en Joost Drenthe het een verske speuld.
De kommende try-outs
Op vrijdag 4 juni is ‘Kom op Verhoal’ ien dörpshuus de Rotonde in Nijkerk. We begunnen om 20:30 en de muzikoale gast is dizze keer Joost Drenthe, de troubadour uut Nijkerk. De vertellers Willem Tjebbe Oostenbrink, Douwe Algra, Wiepie Tolsma en Eelke Solle zetten heur beste bientje veur. as verteller.
Twee week loater is Nuus aan de beurt. Op zotterdag 19 juni goan we aan de wandel deur Nuus en ken het publiek op verschillende mysterieuze plekjes luusteren noar verhoalen en verskes. Omdat het al een bietje ien t schiemerduuster is, wordt dat hiel spannend.
We zuken nog wel een poar muzikanten die op die oavend metdoen willen, stuur een mail noar info@mienwesterkwartier.nl en wij nemmen contact op.
Bijlage: komopverhoalflyer-1-niekerk2.pdf
Dichters ien e tuun 2010
Op zundagmiddag 13 juni wordt veur de daarde moal ‘Dichters ien e tuun’ holden bij Eisseshof ien Nijhoof. Mien Westerkwartier het soamen met Regiotheater Niehove en de kastelein van Eisseshof weer n mooi programma opsteld.
Gasten bennen o.a. Tonko Ufkes., Lucie Pakes, Alie de Vries, Willen Tjebbe Oostenbrink en Arie Meijer komt éénmoalig over uut t verre Westen!
Zanger en liedjesmoaker Sijtse Scheeringa uut Nijhoof, speult een thuuswedstried en verzörgt de muziek dizze middag.
De middag begunt om 15:00 uur en we hopen natuurlijk op mooi weer.
Bijlage: 20100613_muuzen.pdf
 Schriefwedstried
foto Willy Bultje
De finoale van de 15de pervinzioale schriefwedstried is op 11 juni aanstoande. Zol de Westerketierder delegatie weer net zoveul succes hemmen as veurig joar? Kinst derbij weden doar ien t Pervinziehuus op t Martinikerkhof. Dizze oavend begunt om 19:30 en de Fiebeldekwinten kommen laangs om meziek te moaken.
Omdat ze groag wieten willen hoeveul stoelen ze ien e zoal zetten moeten, hemmen ze groag datst dij van te veuren anmeldst.
Stuur veur 7 juni een mail noar Henk Scholte HSO@huisvandegroningercultuur.nl en t komt allemoal veur mekoar
Koekoeksjong – Reinder W. Hiemstra
n Koekoeksjong te Jonkersvoart
har dikke last van veul geproat
omdat er zo brutoal veuraan
ien t nust bij merel Mekkejaan
zien grode havvel open hiel
snel groeide as de Woalse piel
Zo bleven zien mede nustgenoten
n Snoavel met wat veren en poten
(meer ‘Wonderboarlieke dieren uut t Westerkwartier op www.mienwesterkwartier.nl red)
Oameland-1– Melle Hylkema
Wad bij eb
Men voart hier over laand
et goan as troag as de
komst van wotter, vervörmd.
Tussen thuus en thuus,
ien n wereld die
doaraan geliek is
doar zuukt men niks
gijt aan alles
terloops veurbij.
Zo, allent te reizen,
van volk ontdoan,
krigt verlangen hier
de gestalte van een bruid.
“Hou t was” De Groninger Verhalenmiddag
Op zotterdag 12 juni is bij de Grunneger Archieven de verhoalenmiddag van t project “Hou t was”. Resultoaten van dat project hest al zien kint op RTV-Noord ien het programma ‘Het verhaal van Groningen’. De leste tied bennen 85 oldere Grunnegers vroagt om heur verhoal te vertellen, over het leven van alledag en over biezundere gebeurtenissen.
De interviews bennen die middag te bekieken en de Grunneger Verhoalenboom wordt onthuld. Dizze boom met verhoalen is tot en met september bij de archieven en gijt dan op reis deur de provincie. Aanmelden ken bij info@groningerarchieven.nl o.v.v. ‘Hou t was: De Groninger Verhalenmiddag’. De aanmelding moet veur 7 juni binnen wezen
Zie veur het uitgebreide programma van de Verhalenmiddag www.groningerarchieven.nl!
|
