Joe bennen hier: Thuus Older Nijs Nijs 2009 Uutslag schriefwedstried
Uutslag schriefwedstried
Op 20 maart werden de prieswinnoars bekend moakt van de provinzioale schriefwedstrijd 2009 veur t Westerkwartier.
De jury kon kiezen uut moar liefst 50 biedroagen en dat was dus een hiele put veur Jan Blaauw, Annemarie Hommes en Melle Hylkema.

De winnoars:
Jaccolien Smits                        - Dreumvriend (jeugd)
Willem Tjebbe Oostenbrink       - Koevordertocht (gedichten)
Geert Zijlstra                          - Lutje mantje (verhoalen).
Dizze drie zillen ons Westerketier ien juni op de Provinciale Finale vertegenwoordigen.

Kiek ook verder noar het gedicht dat Jan Blaauw schreef veur dizze oavend.

De woorden die aans vlot uut de pen rollen,
loaten me schoamachteg ien e steek. Met
ofhangende scholders, d’elleboog op de toavel,
de haand onner de kin, vollen op t gezicht,
wacht ik op d’ienspiroatsie die schienboarliek
n vrije dag nomen het. Ik maggel doedels
op e raand van t schriefblok, zie n kerk maank
t greun dat versloddert, n vliegtuug oarzelnd
ien e lucht, twee treinen die mekoar veurbij
roazen, tied en tiedgeest, niet begriepend.

t Bovenstuk van e pen is niet zo lekker
as t liekt. Mien ogen stoaren woazeg
noar n kerk woar gien mens n voet zet,
lözze stenen ien rekloametied aanboden
worden veur 10 euro t stuk, de bomen
op n kapvergunning wachten, t vliegtuug
met veul gebeer land is op n ploatje
ien t Dagblad, de treinen barstendevol
over enkel spoor noar de toekomst online
jakkern met staarke wenst noar ienvoud.