Joe bennen hier: Thuus Lees, Kiek en Luuster Gedichten Engel met lucht - Coby Poelman - Duisterwinkel
Engel met lucht - Coby Poelman - Duisterwinkel
k Heb boodschappen ien fietstassen stouwd.
Is fietsen nog wel vertrouwd?
Ik staiger zo’n beetje met t haile geval
As k nait uutkiek komt er nog es n knal.
Mien achterband bonkt over stroat.
Straks is t nog te loat.
Omzichtig rie ik recht op t doel
langs elk stuk glas, om elke koel.

Den rem ik met mien vracht.
Mien band is veuls te zacht.
Woarom zit dat stuk ventiel
altied net bovenaan ien t wiel?
zo ken k er ja noeit bie.
n vremde kerel lacht noar mie
met laive ogen ien hemels blauw;
en vroagt;"Lukt het mevrouw?"

Ien n klain schofke tied
ben k de pomp al kwiet
zien staarke aarms bennen t pompen wel wend
wat ja n alleroarigste vent.
Oplucht ontwiek ik nog net n doef
as ik verend mien engel voorbie stoef.

Coby Poelman-Duisterwinkel
Meer over: Coby Poelman Duisterwinkel