| Verhoalen uut Leek |
Op dunderdag 27 november is in t dörpshuus van Tolbert de CD en t bouk "Verhoalen uut Leek" presenteerd. In aanwezeghaid van perfester Siemon Reker wer t resultoat zain loaten van vroaggesprekken mit dialectproaters uut de gemainte Laik.CD en bouk kosten soamen € 12,50 (CD of bouk lös: € 7,50). Bestellen kin via de Culturele Raad Leek, e-mail: Dit e-mailadres is beschermd tegen spambots. U heeft Javascript nodig om het te kunnen zien. of telefoon 06-30 12 47 02. Alie de Vries en Geesje Vos hebben in t leste kwartoal van 2006 mor laifst 68 lu proaten loaten. Van dizze opnoames binnen fragmenten opnomen op n spaigelploatje. Ale interviews binnen wieder oetschreven en bundeld in n bouk mit verhoalen van ale ondervroagden. t Was n hail karwaai om aal dij verhoalen goud op pepier te kriegen: gesproken teksten binnen wat aans as geschreven teksten. n Lutje viefteg lu wazzen in Tolbert biemekoar kommen om t resultoat van aal dat waark te bewondern. Tonko Ufkes, ofkomsteg van Zeuvenhuzen (en bestuurslid van Mien Westerkwartier) las veur oet aigen waark en Siemon Reker lichtte t belang van dit project tou. Oavend wer aanmekoar proat deur Jur Engels, waarkzoam op de ofdailen cultuur van gemainte Laik en ook betrokken bie de Culturele Raad Leek. Eerste exemploaren van bouk en CD werden oetlangd aan de soamenstelsters: Alie de Vries en Geesje Vos. En dat wer doan deur de twij jongste ondervroagden dij aanwezeg wazzen: Date Jonkman (10 joar) en zien zus Wietske Jonkman (11 joar) van Zeuvenhuzen. |